ZEISU IN HONG GUMKHIA - Zomi Version

​

​JESU IN HONG GUMKHIA

ROM 5: 8 Ahi zongin eite mawhna nei ihih laitakin eite adingin Khrih hong si ahih manin Pasian in eite hong it mahmahna thu hong lak khin hi.

Jesu in kei hong itluat man in Kei adingin hong ki pumpiak khongna pen, Bangzah in lianhiam cih ka ngaihsut kikkik ciang, Amah thokik ngiatlo ding hizen leh zong hong gup nopna a lungtang khawlkik hetlo ding hi-tah! maw ... Cih ka telsinsen hi, ahang pen hong itna sisan leh a khitui a khua-ul ten' ka lungtang sungtawng pek ah Bun takin thu hong gen ngeu-ngeu hi. 

Jesu in kei hong Gupkhiatna pen Ka sih hangin thokik lel ding kahih man in tawmvei kasih pak hang kizo lel ing ka pa maipha muh lawh na lel in, mihingte'n Gupa in hong sanlawh, van miten hong zahtak tuam ngel ding ahih teh, cih lungsim tawh hong Gum maimai hi ngiatlo hi.

Ahang pen: Amah a sithei ngiatlo Pasian a hihna pen puan bangin suahkhia tanghial hi, hibang in ama hihna hong suahkhiat pen hong itna hangin hehpihna hong piakna hi a, kei sihtheihna leh ka mawhna bulomtang teng ama' Vun ding in ki niamkiatna tawh silh liang a, A siacip ka mihing Lungsim lungtang ama ading in kei tungpan hong lak khiatsak in, Ama' hihna hoih Sumngo puan bangin kei hong silhsak hiuhiau hi. 

Jesu hong Gupkhiatna pen angsung khualna tawh gupna nam hilo a, Ki piakkhiatna tawh Gupna hi.

Khatvei lai in Unau Pasal nih om a, a naupa guta buluh ahih man, Thong hongkia hi. A Upa pen Sitni thukhen mang hi a, a naupa mawhna pen ama thu in ki maisak thei lo, Upadi lah ama thu in khel theih ziau hilo ahih man in thu hong ngaihsun hi. 

     Nikhat a Sitni puante silh in Upadi laibu tawh Thonginn a naupa kiang hong pai hi. 

Anau kiang ah Nau aw hih ka sitni puante silh inla, ka laibu te tawi in ci-in a puante silhsak in a laibute tawisak a, tun hitak pan vapaikhia in acih ciangin a Naupan a Upen a paikhia ziauthei ding salel ahih manin lawptak in hong paikhia a, Thong kongcingten Sitni puan silh Upadi laibu tawh apai khia papen Sitni pa mah salel ahih man in, Bangmah paupih lo, A naupa pen a Upa sitni puan tawh hong suakta hiau hi. Ahi zongin a Upa hong paikhiat sawm ciang aman a naupa Thong puante silh ahih man in Thong cingten nangpen Thongkiapia hiteh ci-in paikhia sak lo uh a, Mawhna tawh kituak zah in a naupa sih ding ki khailup ding Ni in Mawh neilo a Upa pen a Naupa a it luat man in Hong si ta hi. Jesu hong Gupkhiatna icih pen hibang mah hi. Hizah liang a itna🙏

Hih tangthu mah bangin kei nuntakna zong 

Hizah tak liangin Jesu in kei hong itna pen hong ki piakkhiat zia in deih phatak in hong telsak sinsen hi. Ka silh ding a kilawm mawhn puan aman silh a, Ama khuk ding a kilawm Kham lukhu kei hong khusak a, mawhnei khat in tua kham lukhu ka khuktheih nadingin Jesu in a lutung tektek ah pat puan ahi lo sik bekbek phim muk bangin a zum silsel ling lom tawh kibang in a kiphan ling lukhu hong khu in kei ading hong thalawh sak hi zezen! "David in Topa aw hizah in kei nong it tham dingin kei in kua hi a, ka innkuan pih ten bang hilel hiam," acih pen David in tulaitak a kei Kammal ding hong gensak khol hi inteh ci liang ing. Ka naupan deuh lai in lingin ka khe themcik hong sunbek le zong sidek in ka kap hi, Jesu aw kei adingin na thuaknate ka mittui inzong cin zo kei ei 😢 (2Kor 5:21, Midik i suah theih nadingin mawhna a neilo Khris pen eita adingin Pasian in mawhnei mi a suaksak hi)

Kei ading hoih mah sicia maw🙏🙏

Sim leitung ah khualzin bangin kapai laitak puk leh bah in ka om ding nong phal loh man in, kei mawhna hang tawh kei tangding mawh lawh na tawi na, tawh na ki khailup nading takpi sing lamteh tawi 40 val a gik hong kipuasak laizen a maw ... Tua singlamteh hong puasak pen Judah galkap te zong hi masakei uh Keima mawhna in natung ah haksatna lompi hong guan ka hizaw 🙏 Kunglam zuan in katai laitak pulklo hoilo tak in kungdong ka tun zawh nadingin Nang-in Calvary lam zuan in Puak hak singlamteh pukpih hoipih in nong puaksak zen maw ... 😪

Kimleh kiang pan haksatna leh buaina namcin ten kei hong nawk zawhloh nadingin Na pangpi pan aluang sisan tawh kei Hong silsiang in nong tuamdam hi. 

     Jesu in kei hong Gupkhiatna pen: mawhnei kahih man in hong gum hi masalo a, hong it masak man in luahsuk mawhna leh nisim khialhna pan mawhlo dinmun ah hong koih nuam in hong gumkhia a Hong maisak ahi hi.

     Kei mawhna in Jesu' mawhnei suksak a Jesu mawhlohna in kei mi mawhlo hong suaksak a, Hell tungding kimlai leitung ah Jesu' in sihna tawh hong kheksak a, Hell ah a omcip kahih loh nadingin Hong Gupkhiatna ii manneih nadingin hong Thokik ahih manin Jesu Hankhuk pan a tawhkik bangin Keizong Hell pan Van ah Jesu' tawh a Thokik kahi a, hih thu in Jesu' hong Gupkhiatna ahi hi. Amen 

     Jesu singlamteh tungah hong sihna in i ngah Gupkhiatna ii bulpi ahi hi, Banghang hiam cihleh Jesu sisan pen ei adingin Pasian in Jesu tungah sep dingin a thupiak tawi tehna hong kikimsak tawi suang ahi hi.

Pasian' Gam sung lut theih nading a kisampen thu in, "Na mawhna uh pan kisikkik un la, Lungdam'na Thu na um ta un" cih thu ahi hi.

(Marka 1:15. “A hunhoih hong tungta a, Pasian’ Uk ding hun hong kipanta hi. Na mawhna uh kisikkik unla, hih Lungdamna Thuthak um un,” ci-in a hilh hi). Pasian' Vantung gampen ei hoihna tawh a tungding i hikei a, Gupkhiatna thu um in i sanna tawh a tungdingte ihih man Pasian' Vantung gam a Tung dingte Pasian deihna bangin a nungta dingte ihi hi.